• ໂທ: 081 312 347 | 020 52394441

ສູນສະຖິຕິປະຈຳແຂວງອຸດົມໄຊ

Oudomxay Provincial Statistics Centre

ຝຶກອົບຮົມການນຳໃຊ້ຖານຂໍ້ມູນສະຖິຕິຂັ້ນບ້ານ ແລະ ແນາະນຳການເກັບກຳຂໍ້ມູນເສດຖະກິດ-ສັງຄົມ

ວຽກ​ງານ​ສະຖິຕິ​ແມ່ນ​ວຽກ​ງານ​ຫນຶ່ງ​ທີ່​ສຳຄັນຕໍ່​ການ​ພັດ ທະນາ​ເສດຖະກິດ-ສັງຄົມ​ພາຍ​ໃນ​ປະ​ເທດກໍ່ຄືແຂວງອຸດົມໄຊ​. ສະນັ້ນ, ​ເພື່ອ​ຮັບປະກັນ​ແກ່​ຂອດ​ການ​ຜະລິດ ​ໄປ​ຫາ​ການ​ເຜີຍ​ແຜ່​ຂໍ້​ມູນ​ສະຖິຕິ​ຕາມ​ມາດຕະຖານ​ສາກົນ ຊື່​ງມັນ​ສ່ອງ​ແສງ​ເຖິງ​ສະພາບ​ຄວາມ​ເປັນ​ຈິງ​ຕາມຫຼັກວິທະຍາສາດສະຖິຕິ. ການສ້າງຄວາມຮູ້ຄວາມສາມາດໃຫ້ແກ່ບຸກຄະລະກອນ ແລະ ວິຊາການໃຫ້ມີຄວາມຊຳນານງານແມ່ນເປັນ ຂອດສຳຄັນອັນໜຶ່ງດ້ານວຽກງານສະຖິຕິ ຂອງລະບົບສະຖິຕິໃນຂອບເຂດທົ່ວແຂວງ ຊຶ່ງມັນສອດຄ່ອງກັບ ການພັດທະນາວຽກງານສະຖິຕິໃນແຕ່ລະໄລຍະ.

     ດັ່ງນັ້ນ, ໃນຕອນເຊົ້າເວລາ 8: 30 ໂມງ ຂອງວັນທີ 6 ມີຖຸນາ 2017  ສູນສະຖິຕິປະຈຳແຂວງອຸດົມໄຊ ໂດຍນຳໃຊ້ງົບປະມານຂອງລັດ ໄດ້ຈັດຝຶກອົບຮົມການນຳໃຊ້ຖານຂໍ້ມູນສະຖິຕິຂັ້ນບ້ານ ແລະ ແນາະນຳການເກັບກຳຂໍ້ມູນເສດຖະກິດ-ສັງຄົມໃຫັບັນດາພະນັກງານສູນສະຖິຕິປະຈຳເມືອງ ການຝຶກອົບຮົມໃນຄັ້ງນີ້ໄດ້ເປີດຂຶ້ນຢ່າງເປັນທາງການ ພາຍໃຕ້ການເປັນປະທານຂອງ ທ່ານ ສອນເພັດ ຂັວນສຸພາ ຫົວໜ້າສູນສະຖິຕິປະຈຳແຂວງ, ໃຫ້ກຽດເປັນປະທານຮ່ວມໂດຍ ທ່ານ ບຸນຮຽມ ໄຊຍະຄຳ  ຫົວໜ້າສູນສະຖິຕິປະຈຳເມືອງ ຮຸນ. ເຊິ່ງມີຜູ້ເຂົ້າຮ່ວມທັງໝົດ 13 ທ່ານ, ຍິງ 0 ທີມງານຈາກສູນສະຖິຕິປະຈຳແຂວງຈຳນວນ 6 ທ່ານ, ຄູຝຶກ 3 ທ່ານ, ບັນດານັກສຳມະນາກອນ ທີ່ຈາກ ສູນສະຖິຕິປະຈໍາເມືອງ 7 ເມືອງໆລະ  1 ທ່ານ. ການຝຶກອົບຮົມໃນຄັ້ງນີ້ແມ່ນ​​ເປັນ​ການ​ສ້າງ​ຄວາມ​ສາມາດ​​ໃນ​ລະບົບ​ສະ​ຖິຕິ​​​ເວົ້າ​ລວມ ​ເວົ້າ​ສະ​ເພາະ​ແມ່ນ​ສ້າງ​ຄວາມ​ອາດ​ສາມາດ​ໃຫ້​ພະນັກງານ​ບຸກຄະລາ​ກອນ​ຜູ້​ທີ່​ເຮັດ​ວຽກງານ​ສະຖິຕິ ໃນຂອບເຂດທົ່ວແຂວງ, ຮຽນຮູ້ກ່ຽວກັບການນຳໃຊ້ຖານຂໍ້ມູນສະຖິຕິຂັ້ນບ້ານ, ນຳໃຊ້ໂປຣແກຣມທາງດ້ານສະຖິຕິເພື່ອການວິໄຈຂໍ້ມູນສະຖິຕິ ແລະ ສຸດທ້າຍແມ່ນແນາະນຳການເກັບກຳຂໍ້ມູນເສດຖະກິດ-ສັງຄົມ, ການຝຶກອົບຮົມຄັ້ງນີ້ຈະໄດ້ດຳເນີນໄປເປັນເວລາ 6 ວັນ ຈິ່ງຈະປິດລົງ (6-11 ມີຖຸນາ 2017).