• ໂທ: 081 312 347 | 020 52394441

ສູນສະຖິຕິປະຈຳແຂວງອຸດົມໄຊ

Oudomxay Provincial Statistics Centre

ໜ່ວຍຊາວໜຸ່ມພະແນກແຜນການ ແລະ ການລົງທຶນແຂວງອຸດົມໄຊ ປະກາດ ແລະ ຮັບຮອງໜ່ວຍ 4 ບຸກ

          ໃນຕອນແລງຂອງວັນທີ 23 ກຸມພາ 2017 ນີ້, ທີ່ຫ້ອງປະຊຸມພະແນກແຜນການ ແລະ ການລົງທຶນແຂວງອຸດົມໄຊ ໄດ້ຈັດພິທີປະກາດ ແລະ ຮັບຮອງໜ່ວຍ 4 ບຸກຂອງໜ່ວຍຊາວໝຸ່ມພະແນກພະແນກແຜນການ ແລະ ການລົງທຶນແຂວງ  ໂດຍການເປັນປະທານ ຂອງ ສະຫາຍ ຄຳຈັນ ລາວຈືເບັງ ຄະນະບໍລິຫານງານຊາວໜຸ່ມແຂວງອຸດົມໄຊ , ເລຂາໜ່ວຍຊາວໜຸ່ມ ພະແນກແຜນການ ແລະ ການລົງທຶນ ໃຫ້ກຽດເຂົ້າຮ່ວມໂດຍສະຫາຍ ອ່ອນແກ້ວ ອຸ່ນອາລົມ ກຳມະການພັກແຂວງ, ເລຂາໜ່ວຍພັກ, ຫົວໜ້າພະແນກແຜນການ ແລະ ການລົງທຶນ ແລະ ສະຫາຍ ບຸນທັນ ສຸລິຍະວົງ ຄະນະບໍລິຫານງານຊາວໜຸ່ມ, ເລຂາຊາວໜຸ່ມແຂວງ, ຕ່າງໜ້າອົງການຈັດຕັ້ງມະຫາຊົນ ພະແນກແຜນການ ແລະ ການລົງທຶນ, ມີບັນດາໜ່ວຍຊາວໝຸ່ມອ້ອມຂ້າງ, ແລະ ສຳມະຊິກຊາວໜຸ່ມພະແນກ ພຜທ ເຂົ້າຮ່ວມຢ່າງພ້ອມພຽງ.

ໃນພິທີ ສະຫາຍ ຄຳຈັນ ລາວຈືເບັງ ເລຂາໜ່ວຍຊາວໜຸ່ມ ພຜທ ກໍ່ໄດ້ໃຫ້ກຽດຂຶ້ນຜ່ານບົດສະຫຼຸບການຈັດຕັ້ງປະຕິບັດຂໍ້ແຂ່ງຂັນ 4 ບຸກ ປີ 2016 ແລະ ທິດທາງແຜນການ 4 ບຸກ ປີ 2017 ຂອງໜ່ວຍຊາວໜຸ່ມ ພຜທ, ຜ່ານການຈັດຕັ້ງປະຕິບັດຂະບວນການ 4 ບຸກຄື: (1) ບຸກດ້ານແນວຄິດ, (2) ບຸກດ້ານການຝຶກຝົນຫຼໍ່ໍ່ອມຮ່ຳຮຽນ, (3) ບຸກດ້ານການຈັດຕັ້ງ ແລະ (4) ບຸກດ້ານວິຊາຊີບສ້າງ-ວຽກເຮັດງານທຳ ແມ່ນໄດ້ສ້າງສະມາຊິກຊາວໜຸ່ມໃຫ້ມີນ້ຳໃຈຮັກຊາດ, ຮັກລະບອບໃໝ່, ຍົກສູງສະຕິຕໍ່ຊາດ, ເປັນເຈົ້າຕົນເອງ, ເຮັດໃຫ້ຊາວໜຸ່ມມີຄວາມເຂັ້ມແຂງທາງດ້ານການເມືອງແນວຄິດ, ເສີມຂະຫຍາຍສະຕິປັນຍາ, ຫົວຄິດປະດິດສ້າງ, ຕ້ານ ແລະ ສະກັດກັ້ນທຸກປະກົດຫຍໍ້ທໍ້ຕ່າງໆ, ເຕົ້າໂຮມທຸກກຳລັງແຮງຂອງຊາວໝຸ່ມທຸກພາກສ່ວນໃນສັງຄົມເຂົ້າຮ່ວມປະຕິບັດແນວທາງນະໂຍບາຍຂອງພັກ ລະບຽບກົດໜາຍຂອງລັດ ແລະ ແຜນພັດທະນາເສດຖະກິດສັງຄົມຢ່າງເປັນຂະບວນ. ສາມາດຕີລາຄາການຈັດຕັ້ງປະຕິບັດຂໍ້ແຂ່ງຂັນ 4 ບຸກຄື (1) ທາງດ້ານແນວຄິດ ຊາວໜຸ່ມແຕ່ລະສະຫາຍມີແນວຄິອຸ່ນອ່ຽງທຸ່ນທ່ຽງ, ມີແນວຄິດຮັກຊາດ ເຊື່ອໜັ້ນຕໍ່ການນຳພາຂອງພັກ; (2) ບຸກດ້ານການຝຶກຝົນຫຼໍ່ຫຼອມຮ່ຳຮຽນເອົາຄວາມຮູ້ຄວາມສາມາດ ທາງດ້ານວັດທະນະທຳ ດ້ານວິຊາສະເພາະ, ວິຊາຊີບ ແລະ ວິທະຍາສາດໃໝ່ໆ, ຮ່ໍ່າຮຽນໃຫ້ຮູ້ນໍາໃຊ້ວິທະຍາສາດເຕັກໂນໂລຊີທີ່ທັນສະໄໜຂອງໂລກ, ຮ່ຳຮຽນພາສາຕ່າງປະເທດ, ຮ່ຳຮຽນປະຫວັດສາດຂອງຊາດ, ຄຸນສົມບັດສິນທໍາປະຕິວັດ, ມູນເຊື້ອຄວາມດຸໜັ່ນ, ຄວາມສາມັກຄີຂອງປະຊາຊົນບັນດາເຜົ່າ; (3) ບຸກດ້ານວຽກງານການຈັດຕັ້ງ ໄດ້ມີການເຕົ້າລວມ ແລະ ແບ່ງຄວາມຮັບຜິດຊອບເພື່ອສະດວກໃນການຕິດຕາມ ແລະ ສໍາຫຼວດກວດກາຕຳນິກໍ່ສ້າງເຊິ່ງກັນ ແລະ ກັນ ຕ້ານ ແລະ ສະກັດກັ້ນປະກົດການຫຍໍ້ທໍ້ໃນຖັນແຖວສະມາຊິກຊາວໜຸ່ມ ແລະ ໄດ້ໄດ້ເຄື່ອນຕາມການຈັດຕັ້ງຂອງຕົນສັງກັດເປັນຢ່າງດີ; (4) ບຸກດ້ານວິຊາຊີບ-ສ້າງວຽກເຮັດງານທຳ ສະມາຊິກຊາວໜຸ່ມໃນໜ່ວຍມີອາຊີບທີ່ໜັ້ນຄົງກຸ້ມຕົນເອງ ແລະ ຄອບຄົວ, ມີແບບແຜນການດຳລົງຊີວິດທີ່ຖືກຕ້ອງຕາມລະບຽບກົດໜາຍບ້ານ – ເມືອງ, ມີແບບແຜນວິທີເຮັດວຽກທີ່ເປັນລະບົບ. ໃນຕະຫຼອດໄລຍະ 1 ປີຜ່ານມາວຽກງານຂະບວນການຊາວໜຸ່ມ ພຜທ ມີລາຍອັນທີຜົນເດັ່ນຄື: ຂະບວນການຕ້ານໄພໜາວ, ມອບເຄື່ອງອຸປະກອນການຮຽນການສອນ ຢູ່ເມືອງ ນາໝໍ້ (ໂຮງຮຽນຊົນເຜົ່າໂຮງຮຽນປະຖົມສົມບູນບ້ານກີວລານ ແລະ ໂຮງຮຽນປະຖົມສົມບູນບ້ານໄຊສຳພັນ) ເປັນມູນຄ່າ 6,000,000 ກີບ ແລະ ຊ່ວຍອຸປະກອນດ້ານກິລາບ້ານຈອມອອງ ເມືອງໄຊ ເປັນມູນຄ່າ 2,000,000 ກີບ; ສົມທົບກັບຊາວໜຸ່ມກະຊວງແຜນການ ແລະ ການລົງທຶນ, ປຸກລະດົມທຶນຈາກອ້າຍນ້ອງສະມາຊິກຊາວໜຸ່ມ ແລະ ພາກສ່ວນຕ່າງໆໄດ້ທັງໝົດ 24,000,000 ກີບຊ່ວຍໃນການສ້າງໂຮງຮຽນປະຖົມບ້ານແຟນ; ເຂົ້າຮ່ວມຂະບວນການຊາວໜຸ່ມອາສາສະໝັກ ສ້າງໂຮງຮຽນຢູ່ ບ້ານຫົວນ້ຳບາກ ແລະ ໂຮງຮຽນ ບ້ານ ນາຮ້ວງ ເມືອງໄຊ ແຂວງອຸດົມໄຊ ແລະ ເຂົ້າຮ່ວມທຸກຂະບວນການລວມຂອງແຂວງເປັນປົກກະຕິ, ສ້າງຂະບວນການກິລາ ແລະ ຂະບວນການຕ່າງໆຮ່ວມກັບບັນດາໜ່ວຍອ້ອມຂ້າງ ແລະ ພາຍໃນເປັນປົກກະຕິ; ຄ່ຽງຄູກັບຜົນງານດັ່ງກ່າວໜ່ວຍຊາວໜຸ່ມ ແລະ ສະມະຊິກຊາວໜຸ່ມໄດ້ມີຜົນງານດີເດັ່ນສະແດງອອກດັ່ງນີ້: ໜ່ວຍຊາວໜຸ່ມ ພະແນກແຜນການ ແລະ ການລົທຶນໄດ້ຮັບໃບຢັ້ງຢືນເປັນໜ່ວຍ 4 ບຸກ ປະຈໍາປີ 2016, ໃນພິທີກໍ່ໄດ້ມອບໃບຍ້ອງຍໍໃຫ້ສະມາຊິກຊາວໜຸ່ມຜູ້ທີມີຜົນງານດີເດັ່ນໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກປີ 2016 ຍ້ອງຍໍຂັ້ນຄະນະບໍລິຫານງານຊາວໝຸ່ມປະຊາຊົນປະຕິວັດລາວຈຳນວນ 30 ສະຫາຍ, ຍິງ 9 ສະຫາຍ, ຍ້ອງຍໍຂັ້ນພະແນກແຜນການ ແລະ ການລົງທຶນ ຈຳນວນ 4 ສະຫາຍ, ຍິງ 2 ສະຫາຍ. ໂດຍແມ່ນຜ່ານການຈັດຕັ້ງປະຕິບັດໃນໄລຍະຜ່ານມາຂອງສາມະຊິກຊາວໜຸ່ມປະຊາຊົນປະຕິວັດລາວທີ່ສາມາດຍາດໄດ້ໄຊຊະນະ ແລະ ຜົນງານອັນຍິ່ງໃຫຍ່ ແລະ ພ້ອມກັນຈັບມືກັນເພື່ອສືບຕໍ່ຈັດຕັ້ງປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມໃຫ້ປະກົດຜົນເປັນຈິງໃນໄລຍະຕໍ່ໄປ.

ສຳລັບທິດທາງແຜນການໃນຕໍ່ໜ້າຂອງຄະນະໜ່ວຍຊາວໜຸ່ມ ພຜທ ຈະສືບຕໍ່ເພີ່ມທະວີສຶກສາອົບຮົມແນວຄິດການເມືອງ ແລະ ກໍ່ສ້າງຊາວໜຸ່ມໃຫ້ມີນໍ້າໃຈຮັກຊາດ ຮັກລະບອບໃໝ່ ເຊື່ອໜັ້ນຕໍ່ການນຳພາຂອງພັກ,ສ້າງໃຫ້ຊາວໜຸ່ມມີຫົວຄິດປະດິດສ້າງ, ມີຄວາມຮັບຜິດຊອບຕໍ່ໜ້າທີ່ຂອງຕົນ, ຍົກລະດັບຄວາມຮູ້ຄວາມສາມາດຂອງສະມາຊິກໃຫ້ດີຂຶ້ນທາງດ້ານທິດສະດີ ແລະ ວິຊາສະເພາະ, ສູ້ຊົນທຸກວິທີເພື່ອໃຫ້ຊາວໜຸ່ມມີອາຊີບເສີມ, ພັດທະນາຄອບຄົວໃຫ້ມີຢູ່ມີກິນ ເປັນຄອບຄົວທີ່ມີຄວາມອົບອຸ່ນສົມບູນ ແລະ ເປັນຄອບຄົວຕົວແບບທາງວັດທະນະທຳ, ເພີ່ມທະວີຄວາມສາມັກຄີພາຍໃນໃຫ້ເລິກເຊິ່ງ-ພາຍນອກໃຫ້ກວ້າງຂວາງແນ່ໃສ່ເພື່ອເຮັດໃຫ້ການຈັດຕັ້ງມີຄວາມໜັກແໜ້ນມີຄວາມເຂັ້ມແຂງກາຍເປັນເສນາທິການ, ກາຍເປັນແຂນຂວາຂອງພັກ ເປັນກະດູກສັນຫຼັງຂອງປະເທດຊາດ.

ພາບ ແລະ ຂາວໂດຍ: ຊາວໜຸ່ມ ພຜທ